වතු සේවක වැටුප් ගැන ධනාත්මක යෝජනා ඉදිරිපත් කරන්න – අගමැති වතු හිමිකරුවන්ට කියයි | Ceylon Britannia

වතු සේවකයන්ගේ වැටුප් වැඩි කිරීම සම්බන්ධයෙන් ධනාත්මකව සිතා ඉදිරි සති කිහිපය තුළ යෝජනා ඉදිරිපත් කරන්නැයි අග්‍රාමාත්‍ය මහින්ද රාජපක්ෂ මහතා වතු සමාගම් හිමිකරුවන්ගෙන් ඉල්ලා සිටියි.

වතු සේවකයන්ගේ වැටුප් වැඩි කිරීම සම්බන්ධයෙන් අවසන් තීරණයකට එළඹ තිබීම ඉදිරි අයවැය යෝජනාවලිය සැකසීමේදී පහසුවක් වන බවද අග්‍රාමාත්‍යවරයා අවධාරණය කළේය. වතු සේවකයකුගේ මූලික වැටුප වන රුපියල් 750ට අමතරව මිල කොටස් අතිරේක දීමනාව (price share supplement) නිෂ්පාදන දීමනාව (productivity incentive) සහ පැමිණිමේ දීමනාව (attendance incentive) යන දීමනාද ඇතුළුව වතු සේවකයකුගේ දෛනික වැටුප රුපියල් දහස දක්වා වැඩි කරන ලෙස ලංකා කම්කරු කොංග්‍රසය කළ ඉල්ලීමට අනුව වතු සමාගම් හිමිකරුවන් සමඟ අරලියගහ මන්දිරයේ ඊ‍යේ (25) පැවති සාකච්ඡාවේදී අග්‍රාමාත්‍යවරයා මේ ඉල්ලීම ඉදිරිපත් කළේය.

කොවිඩ් 19 වසංගත තත්ත්වය හේතුවෙන් ඇති වී තිබෙන ගෝලීය ආර්ථික අර්බුදය නිසා වතු සමාගම් හිමිකරුවන් මුහුණ දී තිබෙන ගැටලු පිළිබඳව ද මේ මොහොතේ අවධානය යොමු කරන ලෙස මෙහිදී ලංකා සේව්‍ය සංගමය අග්‍රාමාත්‍යවරයාගෙන් ඉල්ලා සිටියේය.

මේ සාකච්ඡාව සඳහා ඇමැතිවරුන් වන රමේෂ් පතිරණ, සී. බී. රත්නායක, අග්‍රාමාත්‍ය ලේකම් ගාමිණී සෙනරත්, ලංකා කම්කරු කොංග්‍රසයේ උප සභාපති සෙන්දිල් තොණ්ඩමන්, මහ ලේකම් ජීවන් තොණ්ඩමන් ඇතුළු ලංකා කම්කරු කොංග්‍රසයේ නියෝජිතයන්, වැවිලි කර්මාන්ත සහ අපනයන කෘෂිකර්ම අමාත්‍යාංශයේ ලේකම් රවීන්ද්‍ර හේවාවිතාරණ, ප්‍රජා සවිබලගැන්වීම් සහ වතු යටිතල පහසුකම් සංවර්ධන අමාත්‍යාංශයේ ලේකම් ඩී. පී. ජී. කුමාරසිරි, රාජ්‍ය ව්‍යාපාර දෙපාර්තමේන්තුවේ අධ්‍යක්ෂ ජනරාල් අතුල කුමාර මහතා, වතු සමාගම් හිමිකරුවන් ඇතුළු නියෝජිතයන් පිරිසක් සහභාගි වූහ.

චමීර ඇල්ලදෙණිය

#PresSL #lka #CeylonBritannia

 1,309 total views,  32 views today

Loading...

Leave a Reply

Your email address will not be published. Required fields are marked *